Сценария иди парчам

Парчами давлатии Ҷумҳурии Тоҷикистон яке аз рамзҳои соҳибистиқлолии кишвар маҳсуб меёбад. Он санаи 25-уми ноябри соли 1992-юм, дар Иҷлосияи 16-уми Шӯрои Олии Ҷумҳурии Тоҷикистон қабул карда шуда, айни замон мақоми парчам, тартиби тайёр кардан ва истифода бурдани  Парчами давлатии Ҷумҳурии Тоҷикистон мутобиқи Қонуни Ҷумҳурии Тоҷикистон таҳти №254-ум, аз санаи 12-уми майи соли 2007-ум  оид ба «Рамзҳои давлатии Ҷумҳурии Тоҷикистон» ба тартиб дароварда шудааст.

Парчами давлатии Ҷумҳурии Тоҷикистон аз се хати горизонталӣ иборат аст: хати болоӣ — ранги сурх, хати мобайни – ранги сафед ва хати поёни ранги сабзро доро мебошад.

Хати мобайнии парчам аз рӯи паҳноияш аз хатҳои болоӣ ва поёнӣ ду карат калонтар мебошад. Дар байни хати сафед сурати тоҷи заррин акс ёфтааст аст, ки дар болои он ҳафт ситораи панҷкунҷа дар шакли нимдоира ҷойгир шудаанд.

Хати сурхи парчами Тоҷикистон ифодагари соҳибистиқлолии давлат ва марзи ҳудудии мамлакат мебошад.

Ранги зарди тоҷ ва ситораҳо рамзи покию озодагии кишвар ва саноати коркарди пахта аст.

Ранги сабз рамзи хоҷагии қишлоқи Тоҷикистон ва ифодагари сарсабзиву хуррамии он мебошад.

Тоҷ ва ситораҳо рамзи ҳокимият, иттифоқии табақаҳои иҷтимоии Тоҷикистон аст.

Яке аз ҷойҳои асосии тамошобоб ва шоёни диққат дар Душанбе ин яке аз парчамҳои баландпоя дар ҷахон мебошад, ки моҳи сенятбри соли 2011-ум қомат афрохтааст. Он дар маркази шаҳри Душанбе, дар қисми чапи Қасри Миллат ҷойгир мебошад. Баландии сутунпояи парчам 165 метрро ташкил медиҳад, ки таркиби он аз қубурҳои оҳанини пуриқтидори 12-метра иборат мебошанд.

Давраи банақшадарории сутунпояи парчам ҳанӯз дар соли 2009-ум оғоз ёфтааст. Қисмҳои марказии он соли 2010-ум дар Дубай сохта шуда, баъдан ба шаҳри Душанде фиристода шудааст. Сохтмони расмии сутунпояи парчам дар Рӯзи парчами давлатии Тоҷикистон, санаи 24-уми ноябри 2010-ум огоз ёфтааст. Сутунпояи мазкур аз маводи махсуси мустаҳкам, полиэстери  микрофибровӣ тайёр карда шудааст.

24-уми майи соли 2011-ум нахустин маротиба парчами Тоҷикистон тариқи сутунпояи баланд, ки 310 килграмм вазн дошт, аз ҷониби 50 нафар афсарони Гвардияи миллӣ баланд бардошта шудааст.

Барои корҳои сохтмонӣ ва маводи сутунпоя 32 миллион доллар маблағ масраф шудааст. Он як қисми лоиҳа оид ба замонавигардонии шаҳр  ба муносибати 20-умин солгарди истиқлолияти давлатии Тоҷикистон маҳсуб меёфт.

Бо шинонидани сутунпояҳои баландтарини парчам дар дунё ширкати амрикоии «Trident Support» машғул мешуд, ки ба ҳисоби он 4 рекордгузорони қаблӣ мансуб мебошанд.

Яке аз ҳамин гуна сутунпояҳои баланди парчам, ки аз ҷониби ширкати амрикоии «Trident Support» офарида шудааст, дар маркази шаҳри Бакуи давлати Озарбойҷон қомат афрохтааст ва баландии он 162-юм метр мебошад.

Ин ширкат офарандаи сутунпояи баланди парчам барои давлати Туркманистон низ мебошад, ки баландии он 133 метр буда, дар шаҳри Ашқобод гузошта шудааст.

Ширкати амрикоии «Trident Support» дар давлати  Иордания сутунпояи парчами баландиаш 132-метра ва дар Акаба  сутунпояи парчами баландиаш 127 — метраро дар Амман бунёд намудааст.

Инчунин ширкати  дар боло номбурда дар пойтахти Аморати Муттаҳидаи Араб, шаҳри Абу-Даби низ сутунпояи парчами баландиаш 123 – метраро офаридааст.

Сутунпояи парчами Тоҷикистон ҳамчун яке аз баландтарин сутунпояҳои парчами дунё ба китоби рекордҳои Гинес дароварда шудааст, ки яке аз дастовардҳои муҳими мамлакат ва ифтихори миллати тоҷик ба шумор меравад.

Маълумот дар бораи парчам, Парчами Чумхурии Точикистон Парчами Ҷумҳурии Тоҷикистон дар ин мақола аз сомонаи www.DONISH.su барои шумо >>

Парчами давлатии Ҷумҳурии Тоҷикистон нишон аз давлату давлатдорӣ, иттиҳоду иттифоқи миллати тоҷик, рамзи қудрату тавоноӣ, ифтихор аз Ватану ватандорӣ ва муқаддасоти миллии мост, ки дар худ ормонҳои дирӯзу имрӯз ва фардои дурахшони миллати соҳибтамаддуну шарафманди тоҷикро ифода намудааст.

Парчами миллӣ ифодагари ору номус, шаъну шараф ва эътибори милливу давлатии тоҷикон буда, муҳаббат ва ифтихори доштани он дар рагу пайванд ва қалби ҳар ватандор маъво гирифтааст.

Фархунда бод Рӯзи Парчами давлатии Ҷумҳурии Тоҷикистон, ҳамватанони гиромӣ!

Парчами Ҷумҳурии Тоҷикистон (маълумот)

Бар асоси Низомнома дар бораи Парчами давлатии Ҷумҳурии Тоҷикистон ки 11 декабри соли 1999 бо Қарори № 892 Маҷлиси Олии Ҷумҳурии Тоҷикистон тасдиқ шудааст:

1. Парчами давлатии Ҷумҳурии Тоҷикистон рамзи истиқлолияти давлатии Ҷумҳурии Тоҷикистон мебошад.

2. Парчами давлатии Ҷумҳурии Тоҷикистон матои росткунҷаест, ки дар рӯи он се рахи рангаи ба таври уфуқӣ ҷойгирифта кашида шудааст: рахи боло ранги сурх дошта, паҳнои он ба рахи сабзи поён баробар мебошад; рахи сафеди мобайнӣ якуним баробари паҳнои яке аз рахҳои ранга аст. Дар рӯи рахи сафед, аз ҷои чӯбдаста дар мобайни парчам бо зарҳал рамзи тоҷи тансиқ шуда ва дар болои он ҳафт ситора дар шакли нимдоира тасвир шудааст. Таносуби бару дарозии умумии парчам 1:2 аст.

Тоҷ ва ситораҳои парчам дар шакли росткунҷае ҷой дода шудааст, ки паҳлуи амудиаш 0,8 ва паҳлуи уфуқиаш 1,0-и паҳнои рахи сафед аст. Ситораҳои панҷгӯша дар доираи қутраш 0,15 акс ёфта, дар нимдоираи радиусаш 0,5-и паҳнои рахи сафед ҷой мегиранд.

Тоҷи баландиаш 0,55-и паҳнои рахи сафед, ба асос ба таври нимдоираи радиусаш 1,2-и бари рахи сафед моил мегардад. Чор унсури камоншакл, ки болои тоҷро ташкил медиҳанд, дар марказ бо қисмати доираи қутраш 0, 2-и рахи сафед васл мегарданд.

Шеър дар бораи Парчам дар ин саҳифа <<

24 ноябр рузи Парчами Чумхурии Точикистон (иншо эссе)

Имрӯз мо дар арафаи таҷлили иди пуршукӯҳ, яъне рӯзи Қабули яке аз рамзҳои давлатӣ, Парчами давлатии Ҷумҳурии Тоҷикистон қарор дорем.

Тибқи муқаррароти моддаи 3-и Конститутсияи Ҷумҳурии Тоҷикистон «Рамзҳои давлатии Тоҷикистон Парчам, Нишон ва Суруди миллӣ аст».

Парчами давлатӣ тамоми сокинони кишварро ба ифтихор аз давлату давлатдорӣ, таҳкими истиқлолияти миллӣ, ҳифзи дастовардҳои он ва пеш аз ҳама, ваҳдати миллӣ ва саъйу талоши пайваста ба хотири ободии сарзамини аҷдодӣ раҳнамун месозад.

Бо дидану шунидан ва ба забон овардани вожаҳои Ватан, Парчам, Нишон, Суруди миллӣ, Забони давлатӣ, Президент, марзу буми Тоҷикистон касро беихтиёр ҳисси меҳанпарастию ифтихор аз Ватану ватандорӣ фаро мегирад ва чунин эҳсосоти гарм, махсусан дар замони соҳибистиқлоли Тоҷикистони азиз, зери мавҷҳои  Парчами давлатӣ боз ҳам фараҳбахшу гуворо ба ҷилва  меоянд.

Бояд қайд намуд, ки қабули Парчами давлатии Ҷумҳурии Тоҷикистон таърихи худро дорад. Парчами нави давлатии  Ҷумҳурии  соҳибистиқлоли Тоҷикистон дар сессия Шурои Олӣ 24-ноябри соли 1992 тасдиқ карда шудааст.

Барои таҳияву пешниҳод намудан ва қабули рамзҳои нави Тоҷикистони соҳибистиқлол муддати ду сол қувваҳои эҷодиву ҷустуҷуӣ сарф шудааст. Аввалҳои соли 1990 аз ҷониби Шурои Олии Республикаи Советии Сотсиалистии Тоҷикистон барои таҳия намудани рамзҳои нави давлатӣ, озмун эълон карда шуд ва дар ин озмун тахминан 250 нафар ширкат варзиданд.

Вобаста ба таҳия намудани рамзҳои нави давлати комиссияи махсус ташкил карда шуд, ки сарварии ин комиссияро президенти ҳамонвақтаи Акадамеяи илмҳои Тоҷикистон академик Муҳаммад Осимӣ ба ӯҳда доштанд.  Аз муалифон ва коллективҳои эчодии тамоми минтақаҳои ҷумҳурӣ зиёда аз дусад адад пешниҳодҳо вобаста ба лоиҳаи рамзҳои нави давлатӣ ворид гардида буд.

Вобаста ба таҳияи рамзҳои давлатии Ҷумҳурии Тоҷикистон, ҳамчунин аз тарафи Донишкадаи таърих, Донишкадаи астрофизика ва кумитаи Ҷумҳуриявӣ оид ба терминология лоиҳаҳои рамзҳои давлатии Тоҷикистон пешниҳод карда шуда буданд. Дар охири озумн аз байни санъатшиносон ва рассомон вобаста ба таҳияи рамзҳои давлати гурӯҳ интихоб карда шуд, ки аз он ҷумла рассоми халқии Тоҷикистон Зуҳур Ҳабибуллоев-роҳбар ва лоиҳакаш, Лариса Додхудоева-рассом ва санъатшинос номзади илмҳои санъатшиносӣ, Анатолий Заневсий – президенти иттифоқи дизайнерҳои Тоҷикистон ва Ирина Игнатушина- санъатшинос ходими хизматнишондодаи санъати Тоҷикистон шомил буданд.

Аз тарафи муаллифон лоиҳаи Парчами давлатӣ, ҳамчун матои росткунҷаи се рахаи рангаи уфуқӣ, иборат аз ранги сурх, сафед ва сабз пешниҳод шуд, ки рахи ранги сафед якуним баробари рахҳои ранги сурх ва сабзро ташкил мекард ва бари матоъ бошад якуним баробари дарозии онро ташкил мекард.

Дар аввал ба сифати ангораҳои асоси муаллифон дар Парчами давлатӣ нақши шер, тоҷ ва ситораҳоро нақшнигорӣ намуданд. Нақши шер аз анъанаҳои форсу-тоҷик сарчашма гирифта ҳамчун рамзи боақлӣ, ҷасурӣ ва адолатро ифода менамуд.

Баъд аз ин гурӯҳи корӣ дар Парчами давлатии Ҷумҳурии Тоҷикистон ба ҷои нақши шер нақши тоҷ ва ҳафт ситораро чой намуданд.

Қайд кардан зарур аст, ки нақши тоҷ, ки дар Парчами давлатии Ҷумҳурии Тоҷикистон ҷой дода шуд, ин рамзи давлатдории халқи тоҷдори тоҷик, яъне тоҷ таҷассумгари муттаҳидсозии давлату миллатро ифода менамояд. Дар баробари нақши тоҷ дар Парчами давлатии Ҷумҳурии Тоҷикистон нақши ҳафт ситора дар қисми болои тоҷ дар шакли нимдоира ҷой карда шуд, ки ифодагари рақами хафт ҳамчун рақами муқаддас ва оварандаи хушбахтӣ маънидод карда шуд.

Дар аввал ба ақидаи муалифони Парчами давлатӣ, ҳафт ситора ҳамчун ифодагари ҳафт шоири барҷастаи форсу тоҷик  маънидод шуда буд.

Ҳоло бошад ҳафт ситора, ин ифодагари ҳафт минтақаи таърихию мадании кишвари азизамон Тоҷикистон мебошад, яъне Суғд, Зарафшон, Ҳисор, Рашт, Вахш, Хатлон ва Бадахшон.

Дар давраи кори комиссия оид ба пешниҳоди лоиҳаи рамзҳои давлатӣ, Ҷумҳурии Тоҷикистон 9-сентябри соли 1991 соҳибистиқлолии худро ба даст овард, ки муаллифон бо дарназардошти ташкилшавии давлати навини тоҷикон ва ба даст овардани истиқлолият, арзишҳои миллӣ таърихию фарҳангии халқамонро ба назар гирифта, ранги сурхро, ки дар Парчами давлатӣ ҷой дода шудааст ҳамчун ифодагари – мубориза ва ҷоннисориҳои халқ дар роҳи озодӣ ва истиқлолият, ранги сафед- бахту иқболи сафед, нияти неки халқамон ва ранги сабз – саъю кӯшиш ва заҳмату меҳнати халқ, ки аз он кишварамон сабзу хуррам мешавад маънидод карда шуд.

Дар таърихи 24-ноябри соли 1992 гурӯҳи корӣ оид ба таҳияи рамзҳои нави давлати соҳибистиқлоли Тоҷикистон, ба сессияи 16-уми Шурои Олии Тоҷикистон дар шаҳри Хуҷанд Парчами нави давлатиро ба муҳокимаи вакилони халқ пешниҳод намуданд.

Ҳамон лоиҳаи Парчами давлатӣ, ки таҷҷасумгари таърих, фарҳанг ва арзишҳои миллии халқамон мебошад ва имрӯз мо онҳоро дар Парчами давлати Ҷумҳурии Тоҷикистон мебинем, дар сессия 16-уми Шӯрои Олии Тоҷикистон дар шаҳри Хуҷанд бо сарварии раиси нав интихобгардидаи Шӯрои Олии Тоҷикистон  мӯҳтарам Эмомалӣ Раҳмон, аз ҷониби вакилони халқ якдилона барои қабул намудани он ҳамчун Парчами давлатии Ҷумҳурии Тоҷикистон овоз дода шуд.

Рӯзи дигар, яъне 25-ноябри соли 1992 рамзи нави давлати соҳибистиқлоли Тоҷикистон – Парчами давлатии Ҷумҳурии Тоҷикистон ба толори Шӯрои Олӣ ворид карда шуд ва аввалин маротиба раиси тозаинтихоби ҳамонвақтаи Шӯрои Олии Тоҷикистон мӯҳтарам Эмомалӣ Раҳмон дар назди Парчами давлати сари таъзим фуруд оварда қасам ёд намуд.

Бояд қайд намуд, ки баъди ин Парчами давлатии Ҷумҳурии Тоҷикистон дар болои бинои қасри «Арбоб» дар шаҳри Хуҷанд, ки дар он ҷо сессия таърихии 16-уми Шӯрои Олии Тоҷикистон баргузор гардида буд, барафрохта шуд.

Эҳтироми арзишҳои миллӣ, аз ҷумла Конститутсия, Нишон, Парчам ва Суруди милли ҳамчун ифодагари ифтихори миллӣ, пойдории давлат ва арҷ гузоштан  ба арзишҳои миллию таърихӣ ба ҳисоб меравад.

Вазифаи мо насли имрӯзаи миллат, барои дар рӯҳияи эҳтиром доштану рӯ овардан ба арзишҳои миллӣ ва арҷ гузоштан ба онҳо, тарбия намудани ҷавонону наврасони миллатамон мебошад.

Бояд қайд намоям, ки вобаста  ба тартиби истифодабарии Парчами давлатии Тоҷикистон 11-декабри соли 1992 «Низоманома дар бораи Парчами давлатии Ҷумҳурии Тоҷикистон» ва 12-майи соли 2007-ум Қонуни Ҷумҳурии Тоҷикистон «Дар бораи рамзҳои давлатии Ҷумҳурии Тоҷикистон қабул карда шуд.

Президенти мамлакат Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон бо мақсади эҳтиром ва қадршиносӣ инчунин садоқат ба яке аз рамзҳои асосии давлат – Парчами Тоҷикистон, бо фармони худ аз 20-уми ноябри соли 2009 рузи 24-уми ноябрро рӯзи Парчами  давлатии  Ҷумҳурии Тоҷикистон эълон доштанд ва бо истифода аз ҳуқуқи ташаббуси қонунгузории худ лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Қонун «Дар бораи рӯзҳои ид»-ро ба парлумони ҷумҳурӣ пешниҳод намуданд.

Боиси хушҳолист, ки бо қабули Қонуни мазкур ҳар сол 24 ноябр ҳамчун Рӯзи иди Парчами давлатӣ бо ифтихору сарбаландӣ аз давлату давлатдории миллати тамаддунсози худ ҷашн гирифта мешавад.

Ба хотири мақому манзаллати Парчам дар рукни давлатдорӣ Сарвари давлат ғояи бунёди манораи бузурги Парчамро пешниҳод намуданд, ки аз тарафи умум ҷонибдории комил ёфт. Дар дуюмин солгарди рӯзи Парчами давлатии Тоҷикистон маросими бунёди  манораи бузурги Парчам оғоз гардида, дар давоми як сол ба анҷом расид. Дар бунёди он бинокорони корхонаи «Алюминсохтумон» ва ширкати байналмиллали «Трайдент Саппот» заҳмати зиёд кашида, санъати баланди касбӣ нишон доданд. Натиҷаи ҳамин буд, ки 30-юми августи соли 2011-ум дар маркази ш. Душанбе Парчами давлатии Ҷумҳурии Тоҷикистон дар пояи 165м., ки баландтарин дар ҷахон аст, парафшон гардид. Баландии худи Парчам 30м ва дарозии он 60м мебошад.

Дар охир аз фурсати бароям муяссар шуда, ҳамаи Шуморо ва мардуми Тоҷикистонро  ба ин иди муқаддаси умумимиллӣ табрику муборакбод намуда, осмони софу беғубор ва сиҳатмандиву сарбаландиҳо таманно дорам.

• Шеър дар бораи Парчам дар ин саҳифа <<
• Шеър дар васфи парчам <<

Ҳар сол Тоҷикистон рузи 24 ноябр, сар карда аз соли 2009 иди парчамро таҷлил мекунад. Мақсади ҷашн гирифтани иди парчам бардоштани ҳуввияти миллӣ ва ҳисси ватандустии шаҳрвандон мебошад. Ҳамасола дар кучаю хиёбонҳои шаҳр парчамҳо овезон мешаванд ва маросимоҳои тантанавӣ бо иштироки ҷавонон мегузашт, мардум парчам ба даст сайру гашт мекарданд. Имсол бошад аз сабаби сар задани бемории сироятии Коронавирус чунин ҷашнҳо маҳдуд карда шуд.

Президенти Ҷумҳурӣ, Пешвои миллат Э. Раҳмон имрӯз мардуми кишварро бо иди парчам табрик намуданд ва қайд намуданд, ки “Ҳар як давлати мустақил аз ҷониби ҷомеаи ҷаҳонӣ, аз ҷумла ба шарофати парчами худ эътироф ва эҳтиром карда мешавад. Ин шаҳодат, рамзи таърихи бостонӣ ва фарҳанги бойи миллати тоҷик аст, ки ҳар як узви ҷомеаро вазифадор мекунад, ки ин рамзи муқаддаси миллиро гиромӣ дорад”.

Дигар иқтибосҳои Э. Раҳмон ба муносибати Иди Парчам дар поён оварда шудааст:

“Воқеан, парчами давлати соҳибистиқлоли мо инъикоскунандаи таъриху фарҳанг ва расму оинҳои деримани давлатдории миллиамон, баёнгари мақсаду мароми сокинони мамлакат буда, ба онҳо ба роҳи бунёди ояндаи дурахшон нерӯву қудрати созандагӣ мебахшад”.

“Тоҷикон парчамро ҳамчун нишонаи нангу номус ва адолату осоиш нигоҳдорӣ мекарданд ва ин аст, ки ниёгони мо парафшон будани парчамро бо сарбаландии ҳар як фард баробар дониста, барои ҳифзи он ва то ба рузҳои мо идома пайдо кардани ин суннати аҷдодӣ ҷоннисориҳо карданд”.

“Баъди қабули парчам миллати мо онро ҳамчун ливои озодиву истиқлол ва воситаи сарҷамъиву ба ҳам омадан ба даст гирифта, давлати ҷавони худро аз вартаи ҳалокат ва миллатро аз парокандагӣ раҳо бахшид”.

“Таҷлили рӯзи Парчами давлатӣ ҷашни фарзандонӣ шуҷои ватан, лаҳзаи эҳсоси масъулияти ватандории ҳар як фарди бо нангу номуси ҷомеа ва адои қарзи фарзандӣ дар назди давлат ва миллат мебошад”.
“Минбаъд низ зери Парчами давлатӣ ояндаи дурахшон ва ободиву пешрафти ин сарзаминро таъмин намуда, барои халқи азизи Тоҷикистон зиндагии пурсаодатро муҳайё хоҳем кард».

Парчами Чумхурии Точикистон, 24 ноябр рузи Парчами Чумхурии Точикистон Парчам

Худо кунад, ки ин як порча матоъ барои ҳамеша ифодагари сари баланди тоҷикон бошад! Рӯзи Парчам хуҷаста бод!

Чист парчам? Ифтихори миллат аст,
Чист парчам? Иқтидори миллат аст.
Ҷуз парчам нест тоҷикро нишон,
Чист парчам? Эҳтироми миллат аст.
Рӯзи Парчами давлатӣ муборак!

Парчам ҳуввият, озодагӣ, ва ғуруру номуси миллати асилзодаи мост! Рӯзи Парчами Ҷумҳурии Тоҷикистон муборак!

Фарорасии Рӯзи Парчами давлатро ба ҳамаи шумо ҳамватанони азиз шодбош гуфта, бароятон ба қавли Пешвои муаззами миллат муҳтарам Эмомалӣ Раҳмон: «сари ҳамчун парчам баланду рӯи чун парчам сурх, рӯзгори мисли парчам сабзу бахти чун парчам сафед орзу менамоям».

Бигзор, ҳамеша Парчами давлатӣ – парчами фатҳу кушоиш ва саодату сарфарозии миллату давлати тоҷик парафшон бошад!

Рӯзи Парчами давлатӣ муборак бод, ҳамдиёрони азиз!

Шеър дар васфи Парчам

Парчам нишони мост,
Симурғи некфол
Дар осмони мост.
Таърихи мо, ҳамосаи мо, достони мост,
Бал, Ковиёндирафши куҳанориёни мост,
Рағми аду муқовимати ҷовидони мост,
Дар арши бахт ҷилваи рангинкамони мост,
Боланда чун умеди дилу ормони мост,
Фарҳанги мо, асолату тобу тавони мост,
Чун мисраи баланд
Сар барзада зи дафтари табъи равони мост.

Рамзе, ки он зи ҳар чӣ азизу муқаддам аст,
Парчам аст!

Се ранг дорад он:
Сурху сафеду сабз.
Мазмуни ранг- ранг ба ҳар ранг андар аст,
Дар ранги сурх шуълаи хуршеди Ховар аст,
Сурхии нони гандумии дасти модар аст.
Ранги сафед, роҳи ҷавонони кишвар аст,
Пайғоми сулҳ, боли сафеди кабутар аст.
Сабзаш баҳори сабзи умедасту бовар аст,
Фардои сабзи ин ватани сабзманзар аст.

Чун кӯҳ устувор бувад парчами ватан,
“Шаҳнома”-и виқор бувад парчами ватан!

Боғи муаллақе,
К-аз ранги сабз об хӯрад навбаҳори ӯ,
Хандад шукуфаҳои сафед аз канори ӯ,
Чун лаъли сурх ҷилва кунад лолазори ӯ
Гулбоғи парчам аст!
Ҳар як ситорае, ки дар он мерасад ба чашм,
Болои гул чу қатраи зебои шабнам аст.

Бояд чу қоматаш,
Умре нигоҳи худнигари мо бувад баланд,
Чун насли кӯҳ ҳар назари мо бувад баланд,
Чун бозгӯи асл
Фари мо бувад баланд,
Сари мо бувад баланд!

Он тоҷ, тоҷ бар сари болои миллат аст,
Анвори ӯ таҷассуми фардои миллат аст
В-он печутоб мавҷ зи дарёи миллат аст,
Яъне хабар зи мавҷи гуҳарзои миллат аст,
Ҳар наҷм шаҳчароғ ба шабҳои миллат аст,
Болои ӯй қомати зебои миллат аст.

Поянда бод, қомати сарви биҳишти ӯй,
Чун сарнавишти мост кунун сарнавишти ӯй.

Сайри қадаш зи мард шуҷоат кунад талаб,
Авсофи ӯ зи фард фасоҳат кунад талаб,
Ҳуснаш зи чашм дарси назокат кунад талаб,
Меҳраш даруни сина масоҳат кунад талаб,
Подорияш зи шахс матонат кунад талаб,
Оре, ҳамеша аҳд садоқат кунад талаб.

Мо қади худ ба парчами худ поя мекунем,
Бар офтоб бурдаву ҳамсоя мекунем!

Бархез, эй рафиқ,
Маҳкам ба шоҳбанди ҷасорат камар кунем,
То парчами ватан ҳама ҷо ҷилвагар кунем,
Бо фахру бо ғурур,
Дар дидаҳо сурур
Бар қомати баланди баландаш назар кунем,
То дурдасти бахту саодат сафар кунем,
Таърихи хеш номаи бахту зафар кунем.

Парчам, маро ҳамеша тамошоят орзуст,
Як мисраи баланди чу болоят орзуст!

Озар Салим

Ҳамаи шуморо ба муносибати Рӯзи Парчам давлатӣ, ки ба қавли Пешвои миллат муҳтарам Эмомалӣ Раҳмон «рамзи бахту саодат, сарбаландии миллату давлати тоҷикон буда, симои мардуми тамаддунсози моро дар арсаи байналмилалӣ муаррифӣ мекунад», табрик мегӯям ва хоҳони онам, ки парчами давлатии мо дар фазои орому осудаи мамлакат ҳамеша роҳнамову роҳкушои ҳар яки мову шумо ба сӯи ояндаи неку осуда ва фатҳи қуллаҳои мурод бошад.

Табрикот ба Рузи Парчами Чумхурии Точикистон

Парчам рамзи муқаддаси озодӣ ва ҳувияти миллии халқи куҳанбунёд ва тамаддунпарвари тоҷик аст. Парчам, ки баланд аст, сари моро ҳамеша баланд медорад. Парчам ба мо неру, шукӯҳ ва ифтихори ватандорӣ мебахшад. Ин парчам ба мо на фақат шукӯҳу сарбаландӣ мебахшад, балки эҳсоси ватандориро дар мо бедор ва поянда медорад, муҳаббати Ватанро дар вуҷудамон фурӯзон месозад.

Ҳар соҳибватан ҳангоми иштирокаш дар мусобиқаву озмунҳои байналмилалӣ бо худ арзишмандтарин чиз, яъне Парчами давлатиро мебарад.

Ҳамаи Шумо ҳамдиёрони азиз ва дар шахсияти Шумо тамоми миллати парчамбардори тоҷикро ба муносибати Рӯзи Парчами давлатии Ҷумҳурии Тоҷикистон табрику шодбош гуфта, бароятон сарбаландию сарфарозӣ, иқболу комёбӣ ва хонаободиро таманно менамоям.

Бигзор, Парчами давлатии халқи тоҷик, ҳамчун дирафши фатҳу иршоди нек то абад парафшон бошад!

Рӯзи Парчами давлатии Ҷумҳурии Тоҷикистон муборак!

ТОҶИКИСТОН ПАРЧАМАТ ПОЯНДА БОД!

Парчами мо худ сари болои миллат гаштааст,
Қудрати озодагонро авҷи ҳиммат гаштааст.

Қосиди сулҳ, меъмори ваҳдат, Пешвои сулҳофари миллат дар бораи Парчам чунин гуфтаанд:

“Парчами миллӣ яке аз рамзҳои муҳими истиқлолияти миллӣ ва давлатдории муосири мо, таҷассумгари асосҳои таърихӣ ва рамзҳои давлатдории гузаштаи тоҷикон, инчунин ифодакунандаи мақсаду маром ва орзуву ормонҳои тамоми мардуми Тоҷикистон мебошад.” Эмомали Раҳмон

Солгарди навбатии Рӯзи Парчами миллии Ҷумҳурии Тоҷикистонро ба кулли ҳамватанон ва дӯстону пайвандони азизам сидқан шодбош гуфта, таманнои онро дорам, ки ливои давлати тоҷикон дар фазои сулҳу оромӣ ва рушди босуботи иҷтимоию иқтисодии кишвари биҳиштосоямон ҷовидона, парафшонӣ намояд.

Парчам – шиносномаи миллат ва эҳтиром ба парчам эҳтиром ба миллат аст. Дар шароити кунунӣ, ки тафриқа миёни миллатҳо ба авҷи аълост, моро зарур аст, ки зери сояи як парчам, “Парчами миллӣ”, парчами шукӯҳманди Тоҷикистони соҳибистиқлоли азиз, муттаҳид шавем ва қудрати ҳифзи ватанро дошта бошем.

Рӯзи Парчами давлатии Тоҷикистон муборак бод, ҳамватанони азиз!

• Рузи Парчами Чумхурии Точикистон (24 ноябр эссе) 
• Шеър дар бораи Парчами Точикистон 

50 популярных слов для перевода с татарского русский язык

30 популярных выражений для перевода с татарского русский язык

20 популярных фраз для перевода с татарского русский язык

Пожалуйста, помогите c переводом:

Пожалуйста, помогите откорректировать тексты:

Популярные направления онлайн-перевода: